ကြံ့ဖွံ့က ပြိုင်ဘက် NLD ကိုယ်စားလှယ်လောင်းကို ပုတ်ခတ်ပြောဆိုပြီး မဲဆွယ်

မတ်လ ၁၉ ရက်နေ့၊ ၂၀၁၂ ခုနှစ်။

လာမည့် ဧပြီလ ၁ ရက်နေ့မှာ ကျင်းပပြုလုပ်မည့် ကြားဖြတ် ရွေးကောက်ပွဲတွင် စစ်ကိုင်းတိုင်းဒေသကြီး၊ ရွှေဘိုခရိုင် ကန့်ဘလူမြို့နယ် အမျိုးသားလွှတ်တော် အမှတ် (၃)  မဲဆန္ဒနယ် (ကန့်ဘလူ၊ ကျွန်းလှ၊  ရေဦး၊ တန့်ဆည်) မှာ ဝင်ရောက်ယှဉ်ပြိုင်မည့်  ကြံ့ခိုင်ရေးနှင့် ဖွံ့ဖြိုးရေးပါတီမှ  ဦးတင်မောင်ဝင်းက ကန့်ဘလူမြို့နယ် ထန်းတပင်ကျေးရွာ ဘုရားကွင်းအတွင်းမှာ  သူ၏ ပြိုင်ဘက် ကိုယ်စားလှယ်လောင်းတဦးဖြစ်သည့် အမျိုးသား ဒီမိုကရေစီ အဖွဲ့ချုပ် (NLD) မှ ဒေါက်တာ မြင့်နိုင်ကို ပုတ်ခတ်ပြောဆိုပြီး မဲဆွယ်စည်းရုံးရေး ပြုလုပ်ခဲ့သည်ဟု သိရှိရပါသည်။

မတ်လ ၁၈ ရက်နေ့ နံနက် ၁၀း၀၀ နာရီမှ ၁၁း၃၀ အချိန်ထိ ကျင်းပပြုလုပ်ခဲ့သည့် မဲဆွယ်စည်းရုံးဟောပြောပွဲမှာ ဦးတင်မောင်ဝင်းက ဒေါက်တာမြင့်နိုင်သည် ထောင်ထွက်တယောက်ဖြစ်သည့်အပြင် မိန်းမ ၂ ယောက် ယူထားတယ် ဆိုတဲ့ ပုဂ္ဂိုလ်ရေး တိုက်ခိုက်မှုတွေကို ပြောဆိုခဲ့ပြီး သူဟာ စစ်ဦးစီးအရာရှိ (ပထမတန်း) ဖြစ်ကြောင်း၊ တပ်မတော်က နိုင်ငံအတွက် တကယ် အလုပ်လုပ်နေတာ ဖြစ်ကြောင်း ဟောပြောခဲ့တယ်လို့  အဆိုပါ မဲဆွယ်စည်းရုံးရေး ဟောပြောပွဲကို တက်ရောက်ခဲ့သည့် ဒေသခံတဦးက ပြောပါသည်။

ဒါ့အပြင် မဲဆွယ်စည်းရုံးရေး မစခင် မတ်လ ၁၈ ရက်နေ့  မနက်ပိုင်းမှာ ထန်းတပင်ကျေးရွာ အုပ်ချုပ်ရေးမှူးက တအိမ်တယောက် မဲဆွယ်စည်းရုံးပွဲကို မလာမနေရ တက်ရောက်ရမယ်ဆိုပြီး အသံချဲ့စက်နှင့် လှည့်လည် ကြေညာခဲ့ပါသည်။ ထန်းတပင်ကျေးရွာမှာ လူနေအိမ်ခြေ ၃၀၀ ကျော် ရှိသည့်အတွက် ကြံ့ခိုင်ဖွံ့ဖြိုးရေးပါတီ၏ မဲဆွယ်စည်းရုံးရေး ဟောပြောပွဲကို ဒေသခံအယောက် ၃၀၀ ကျော် တက်ရောက်ခဲ့ကြပါသည်။

"ရွေးကောက်ပွဲ ကော်မရှင်ကရော အစိုးရကရော ပြောနေတဲ့ လွတ်လပ်ပြီး မျှတတဲ့ ရွေးကောက်ပွဲ ဆိုတာက အောက်ခြေမှာ ဖြစ်ပျက် နေတဲ့ပုံစံက အဲလိုမဟုတ်ဘူးဖြစ်နေတယ်။ ဒေသဆိုင်ရာ အုပ်ချုပ်ရေးအဖွဲ့တွေဟာ ကြံ့ခိုင်ရေးပါတီကို အတိုင်းအတာတခုထိ ကူညီပံ့ပိုးနေတာဟာ လွတ်လပ်ပြီး မျှတတဲ့ ရွေးကောက်ပွဲဆိုတာ ဖြစ်ပါ့မလားဆိုတာ သံသယဝင်စရာ ဖြစ်နေပြီ" လို့ ထန်းတပင်ကျေးရွာက ဒေသခံတဦးက ဘားမားဗီဂျေ မီဒီယာကို ပြောပါသည်။

(ကန့်ဘလူ၊ ကျွန်းလှ၊ ရေဦး၊ တန့်ဆည်) အမျိုးသားလွှတ်တော် အမှတ်(၃)မဲဆန္ဒနယ် နေရာမှာ အမျိုးသား ဒီမိုကရေစီအဖွဲ့ချုပ်မှ ဒေါက်တာ မြင့်နိုင်၊ ကြံ့ခိုင်ရေးနှင့် ဖွံ့ဖြိုးရေး ပါတီမှ ဦးတင်မောင်ဝင်း နှင့် တိုင်းရင်းသား စည်းလုံး ညီညွတ်ရေး ပါတီမှ ဦးတိုးမြင့်အောင် တို့ ဝင်ရောက် ယှဉ်ပြိုင်မှာ ဖြစ်ပါသည်။

0 comments: